- بعد 3 سنين من الثورة ، قررت أكتب . أكتب ليه ؟ مش عارف ، طب أكتب عن إيه ؟ بردو مش عارف . أنا تقريبا مبقتش عارف حاجة . مبقتش عارف أنا صح و لا غلط . انا بنجح و لا بفشل . انا بطلع لقدام ولا برجع لورا .
- في وسط حالة من اليأس موجودة في كل مكان حواليك ، موجودة في البيت ، في الشغل ، في القهوة ، في الشارع .. في كل مكان انت ممكن تكون فيه .. و في الحالة دي مبتبقاش عارف تعمل ايه ؟! تحلم و تتمسك بحلمك و لا تستسلم و تقضيها بقى و اهي حياة و بتتعاش . طب دينك اللي بيقولك " تفاءلوا بالخير تجدوه " . طب احلامك اللي كبرت جواك . طب كلام منير اللي دايما بيزقك للحلم و ان الحلم هو الحياة . انا مبقتش عارف ، مبقتش قادر أقيم و لا أحدد و لا بقيت حتى واثق في معاييري .. علشان كده قررت أكتب . مش علشان في ناس قالتلي قبل كده ان أسلوبك كويس ، لأ .. انا اصلا مبقتش واثق في آرائي علشان أثق في آراء الناس . ممكن أكون بكتب علشان أخرج طاقة جوايا و ممكن أكون بكتب علشان قاعد فاضي مش لاقي حاجة أعملها . بس اللي أنا متأكد منه أني بكتب علشان أسجل اللحظة التاريخية دي .. اللحظة اللي بشعر فيها ان جوا دماغي و قلبي "معجنة" من الأفكار و الأحاسيس ، يمكن قدام شوية لما أوصل لحاجة أفتح الكلام ده وأقراه تاني .
-خرة .. هي كلمة من 3 حروف فيها وصف شامل و وافي و كافي و صادق ... و قول زي ما انت عايز لما تحب توصف الحياة اللي بقينا عايشنها ... مجتمع خرة ، حكام خرة ، سياسين خرة ، اخوان خرة ، عسكر خرة ، انتخابات خرة ... وكله خرة في خرة من أول علاقتنا الأسرية و المجتمعية لحد حتى علاقتنا بالدول و الشعوب التانية . و المطلوب منك انك تركب جناحات و تبقى سوبر مان و تعدي من فوق كل الخرة و توصل في الآخر للنجاح .
- نجاح ؟! مين اللي قال نجاح ؟! هو يعني إيه أصلا نجاح ؟ و امتى أحس ان انا ناجح ؟! يا ترى لما أعمل فلوس كتير بغض النظر عن طريقة جمعها .. ولا يا ترى النجاح هو الجواز باعتباره انتقال من وضع اجتماعي "صايع" لوضع اجتماعي تاني "متزوج و عنده بيت " .. و لا النجاح إني أبقى رقاص أطبل لده و ده علشان أوصل و بعد ما أوصل أبقى نجحت ولا النجاح اني أفضل محافظ على مبادئي و قيمي و أسلوبي حتى لو هيوديني في داهية ! .. في الحقيقة أنا مش قادر أقرر ايه هو أصلا معيار النجاح . أصل اللي عايش في البلد دي لازم يحصل عنده تشويش في أفكاره ... مستني ايه من بلد رموزها تامر حسني و مصطفى بكري و غادة عبرازق .. مستني إيه ؟! مستني إيه من أجيال عاشت قبلك أيام و سنين في البلد دي و ضاقت الذل و الفقر والإهمال فيها و مبيصدقوا ينزلوا يقولوا "نعم" و يرقصوا كمان .. مع إن شوف حكمة ربنا يا مؤمن مكنتش تشوف حد فيهم الا لما تلاقيه لاصق النضارة في وش أمه و قاعد يقرأ الجرنان تقولشي شكسبير ..
- بعد 3 سنين من يناير .. الحلم اللي افتكرنا انه هياخدنا لدولة الميدان ، الدولة الطاهرة النقية الصادقة القوية . نفوجأ بكابوس العسكر والاخوان و النخبة و العواجيز .. و كله بيتاجر يابن عمي .. تجارة بالدم بقى او تجارة بالدين او تجارة بالثورة او بالحلم ... و مرة واحدة بقت يناير انتفاضة العملا و كل البلد أشراف .. و احنا كشباب السبب الرئيسي لخراب البلد .. شفت الخرة !
- أنا من هنا مبقتش عارف أنا المفروض أعمل ايه و أعمله ازاي ولا أعمله امتى .. والمشكلة الأكبر اني بلمس كده في كل اللي حواليا من سني و اللي ظروفهم قريبة من ظروفي .. مبقتش عارف أمشي مع الموجة و أكدب على نفسي و لا أمشي ضد الموجة و أبقى متهور و مش عارف مصلحتي في نظر الناس علشان خاطر أكسب رضا نفسي ... يا الله إليك السؤال !
ليست هناك تعليقات:
إرسال تعليق